(5 ਜਨਵਰੀ 2021) ਲੇਖਿਕਾ: ਗੁਰਪ੍ਰੀਤ ਕੌਰ ਸੈਣੀ
ਸ਼ਾਇਰ: ਭੁਪਿੰਦਰ ਸਿੰਘ ਸੱਗੂ
(ਸ਼ਬਦ: 450)
ਪੁਸਤਕ: ਚਸਕਾ ਕਿੱਟੀ ਦਾ
ਲੇਖਿਕਾ: ਗੁਰਪ੍ਰੀਤ ਕੌਰ ਸੈਣੀ
‘ਚਸਕਾ ਕਿੱਟੀ ਦਾ’ ਪੰਜਾਬੀ ਪੁਸਤਕ ਪਹਿਲੀ ਨਜ਼ਰੇ ਬਾਲ ਪੁਸਤਕ ਅਤੇ ਵਿਅੰਗ ਪੁਸਤਕ ਦਾ ਭੁਲੇਖਾ ਪਾਉਂਦੀ ਹੈ। ਪਰ ਜਦੋਂ ਇਸਦਾ ਪਾਠ ਕਰਦੇ ਹਾਂ ਤਾਂ ਇਹ ਪੁਸਤਕ ਬਹੁਤ ਗੰਭੀਰ ਮਸਲਿਆਂ ਨੂੰ ਪੇਸ਼ ਕਰਦੀ ਹੋਈ ਵੇਖੀ ਜਾ ਸਕਦੀ ਹੈ। ਇਸ ਪੁਸਤਕ ਦੀ ਲੇਖਿਕਾ ਗੁਰਪ੍ਰੀਤ ਕੌਰ ਸੈਣੀ ਹਰਿਆਣੇ ਦੀ ਬਹੁਤ ਸੰਜੀਦਾ ਲੇਖਿਕਾ ਦੇ ਤੌਰ ’ਤੇ ਜਾਣੀ ਜਾਂਦੀ ਹੈ। ਉਹਨਾਂ ਦੀ ਇਸ ਪੁਸਤਕ ਵਿੱਚ ਹਿਸਾਰ ਸ਼ਹਿਰ ਬਾਰੇ ਬਹੁਤ ਮਹੱਤਵਪੂਰਨ ਅਤੇ ਨਵੇਕਲੀ ਜਾਣਕਾਰੀ ਪ੍ਰਾਪਤ ਹੁੰਦੀ ਹੈ। ਲੇਖਿਕਾ ਵੱਲੋਂ ਹਿਸਾਰ ਸ਼ਹਿਰ ਦੇ ਪੁਰਾਤਨ ਇਤਿਹਾਸ ਨੂੰ ਵਧੀਆ ਢੰਗ ਨਾਲ ਪਾਠਕਾਂ ਸਾਹਮਣੇ ਪੇਸ਼ ਕੀਤਾ ਗਿਆ ਹੈ।
‘ਚਸਕਾ ਕਿੱਟੀ ਦਾ’ ਪੁਸਤਕ ਵਿੱਚ ਛੋਟੇ-ਛੋਟੇ ਲੇਖ ਸ਼ਾਮਿਲ ਕੀਤੇ ਗਏ ਹਨ। ਹਰ ਲੇਖ ਦਾ ਵਿਸ਼ਾ, ਆਕਾਰ ਅਤੇ ਲਹਿਜ਼ਾ ਵੱਖਰੇ ਤਰ੍ਹਾਂ ਦਾ ਹੈ। ਇਸ ਪੁਸਤਕ ਨੂੰ ਹਰਿਆਣਵੀ ਪੰਜਾਬੀ ਪਾਠਕਾਂ ਲਈ ਲਾਹੇਵੰਦ ਦਸਤਾਵੇਜ਼ ਕਿਹਾ ਜਾਵੇ ਤਾਂ ਕੋਈ ਅਤਕਥਨੀ ਨਹੀਂ ਹੋਵੇਗੀ।
‘ਚਸਕਾ ਕਿੱਟੀ ਦਾ’ ਵਿੱਚ ਵਿਆਹਾਂ-ਸ਼ਾਦੀਆਂ ’ਤੇ ਗਾਏ ਜਾਂਦੇ ਲੋਕ ਗੀਤਾਂ ਬਾਰੇ ਬਹੁਤ ਵਧੀਆ ਲੇਖ ਪਾਠਕਾਂ ਦਾ ਧਿਆਨ ਖਿੱਚਦਾ ਹੈ। ਇਸ ਤੋਂ ਇਲਾਵਾ ਖੇਡਾਂ, ਨਸ਼ਿਆਂ ਅਤੇ ਤਿੱਥ-ਤਿਉਹਾਰਾਂ ਬਾਰੇ ਲਿਖੇ ਲੇਖ ਵੀ ਕਾਬਿਲੇਤਾਰੀਫ਼ ਹਨ।
ਆਖ਼ਰ ਵਿੱਚ ਗੁਰਪ੍ਰੀਤ ਕੌਰ ਸੈਣੀ (ਹਿਸਾਰ) ਦੀ ਇਹ ਪੁਸਤਕ ਹਰਿਆਣੇ ਦੇ ਪੰਜਾਬੀ ਸਾਹਿਤ ਜਗਤ ਵਿੱਚ ਸ਼ਲਾਘਾਯੋਗ ਕਾਰਜ ਕਿਹਾ ਜਾ ਸਕਦਾ ਹੈ।
ਪੰਨੇ: 88, ਮੁੱਲ: 200 ਰੁਪਏ
ਪ੍ਰਕਾਸ਼ਕ: ਤਰਲੋਚਨ ਪਬਲਿਕੇਸ਼ਨ, ਚੰਡੀਗੜ੍ਹ
**
ਪੁਸਤਕ: ਦਰਦ ਜਾਗਦਾ ਹੈ
ਸ਼ਾਇਰ: ਭੁਪਿੰਦਰ ਸਿੰਘ ਸੱਗੂ
ਬਰਤਾਨਵੀ ਪੰਜਾਬੀ ਸ਼ਾਇਰ ਭੁਪਿੰਦਰ ਸਿੰਘ ਸੱਗੂ ਦਾ ਨਵ-ਪ੍ਰਕਾਸ਼ਿਤ ਕਾਵਿ-ਸੰਗ੍ਰਹਿ ‘ਦਰਦ ਜਾਗਦਾ ਹੈ’ ਅੱਜਕਲ੍ਹ ਪੰਜਾਬੀ ਸਾਹਿਤ ਜਗਤ ਵਿੱਚ ਚਰਚਾ ਦਾ ਵਿਸ਼ਾ ਬਣਿਆ ਹੋਇਆ ਹੈ। ਇਸ ਕਾਵਿ-ਸੰਗ੍ਰਹਿ ਵਿੱਚ 62 ਖੁੱਲ੍ਹੀਆਂ ਕਵਿਤਾਵਾਂ ਨੂੰ ਸ਼ਾਮਿਲ ਕੀਤਾ ਗਿਆ ਹੈ।
ਭੁਪਿੰਦਰ ਸਿੰਘ ਸੱਗੂ ਦੀ ਸ਼ਾਇਰੀ ਪੁਖ਼ਤਾ ਅਤੇ ਗੰਭੀਰ ਪਰਵ੍ਰਿਤੀ ਵਾਲੀ ਸ਼ਾਇਰੀ ਹੈ। ਉਹ ਬਹੁਤ ਘੱਟ ਲਫ਼ਜ਼ਾਂ ਵਿੱਚ ਵੱਡੀ ਗੱਲ ਕਹਿਣ ਦੇ ਸਮਰੱਥ ਸ਼ਾਇਰ ਹੈ। ਉਸਦੀਆਂ ਕਵਿਤਾਵਾਂ ਨੂੰ ਪੜ੍ਹਦਿਆਂ ਇਸ ਗੱਲ ਦਾ ਇਹਸਾਸ ਹੋ ਜਾਂਦਾ ਹੈ।
‘ਦਰਦ ਜਾਗਦਾ ਹੈ’ ਕਾਵਿ-ਸੰਗ੍ਰਹਿ ਵਿੱਚ ਭੂਹੇਰਵੇ ਦੀਆਂ ਕਵਿਤਾਵਾਂ, ਮਾਂ ਤੋਂ ਬਿਨਾਂ ਸੁੰਨੇ ਵਿਹੜੇ ਦੀ ਕਵਿਤਾ, ਪਿੰਡ ਦੀਆਂ ਯਾਦਾਂ, ਭ੍ਰਿਸ਼ਟਾਚਾਰ ਅਤੇ ਸਿੱਖ ਦੀ ਪਛਾਣ ਨਾਲ ਸੰਬੰਧਤ ਕਵਿਤਾਵਾਂ ਵਿਸ਼ੇਸ਼ ਰੂਪ ਵਿੱਚ ਪਾਠਕਾਂ ਦੇ ਮਨ-ਮਸਤਕ ਨੂੰ ਟੁੰਬਦੀਆਂ ਹਨ।
ਭੁਪਿੰਦਰ ਸਿੰਘ ਸੱਗੂ ਦੀ ਸ਼ੈਲੀ ਵੱਖਰੇ ਢੰਗ ਦੀ ਹੈ। ਉਹ ਆਪਣੀਆਂ ਕਵਿਤਾਵਾਂ ਵਿੱਚ ਮੁਹਾਵਰੇ ਜਾਂ ਲੁਕਵੀ ਸ਼ੈਲੀ ਨਹੀਂ ਵਰਤਦਾ ਬਲਕਿ ਸਿੱਧੇ ਅਤੇ ਸਰਲ ਢੰਗ ਨਾਲ ਆਪਣੀ ਕਵਿਤਾ ਨੂੰ ਪਾਠਕਾਂ ਦੇ ਸਾਹਮਣੇ ਪੇਸ਼ ਕਰ ਦਿੰਦਾ ਹੈ। ਇਹ ਗੁਣ ਬਹੁਤ ਘੱਟ ਸ਼ਾਇਰਾਂ ਵਿੱਚ ਹੁੰਦਾ ਹੈ।
‘ਨਰਸਾਂ’ ਕਵਿਤਾ ਵਿੱਚ ਸਰਕਾਰੀ ਕੰਮ ਦੇ ਬੋਝ ਨੂੰ ਪੇਸ਼ ਕੀਤਾ ਗਿਆ ਹੈ। ਸੱਗੂ ਅਨੁਸਾਰ ਨਰਸਾਂ ਤਾਂ ਕਾਗਜ਼ਾਂ ਦੇ ਬੋਝ ਹੇਠਾਂ ਹੀ ਦੱਬੀਆਂ ਪਈਆਂ ਹਨ, ਉਹਨਾਂ ਮਰੀਜ਼ਾਂ ਦਾ ਇਲਾਜ ਕਿੱਥੇ ਕਰਨਾ ਹੈ? ਪਰ ਇਹ ਨਰਸਾਂ ਦੀ ਹੱਲਾਸ਼ੇਰੀ ਹੈ ਕਿ ਉਹ ਮਰੀਜ਼ਾਂ ਦਾ ਇਲਾਜ ਕਰਨ ਲਈ ਟਾਈਮ ਕੱਢਦੀਆਂ ਹਨ। ਇਸ ਤਰ੍ਹਾਂ ਦੀਆਂ ਹੋਰ ਕਵਿਤਾਵਾਂ ਵੀ ਪੜ੍ਹਨ ਨੂੰ ਮਿਲ ਜਾਂਦੀਆਂ ਹਨ।
ਆਖ਼ਰ ਵਿੱਚ ਭੁਪਿੰਦਰ ਸਿੰਘ ਸੱਗੂ ਹੁਰਾਂ ਨੂੰ ‘ਦਰਦ ਜਾਗਦਾ ਹੈ’ ਜਿਹਾ ਬਾਕਮਾਲ ਕਾਵਿ-ਸੰਗ੍ਰਹਿ ਪੰਜਾਬੀ ਪਾਠਕਾਂ ਦੀ ਝੋਲੀ ਪਾਉਣ ਲਈ ਢੇਰ ਸਾਰੀਆਂ ਮੁਬਾਰਕਾਂ।
**
ਪੰਨੇ: 104, ਮੁੱਲ: 180 ਰੁਪਏ
ਪ੍ਰਕਾਸ਼ਕ: ਪ੍ਰੀਤ ਪਬਲੀਕੇਸ਼ਨ।
*****
ਨੋਟ: ਹਰ ਲੇਖਕ ‘ਸਰੋਕਾਰ’ ਨੂੰ ਭੇਜੀ ਗਈ ਰਚਨਾ ਦੀ ਕਾਪੀ ਆਪਣੇ ਕੋਲ ਸੰਭਾਲਕੇ ਰੱਖੇ।)
(ਸਰੋਕਾਰ ਨਾਲ ਸੰਪਰਕ ਲਈ: This email address is being protected from spambots. You need JavaScript enabled to view it.)
