“ਇੱਕ ਵਪਾਰੀ ਦੇ ਘਰ ਪੁੱਤ ਦੀ ਫੋਟੋ ਅਤੇ ਨਾਲ ਬੰਦੂਕ ਦੀ ਗੋਲੀ ਵਾਲਾ ਪਾਰਸਲ ਭੇਜਿਆ ...”
(20 ਫਰਵਰੀ 2026)

ਸਰਕਾਰੀ ਏਜੰਸੀਆਂ ਮੁਤਾਬਿਕ ਪੰਜਾਬ ਵਿੱਚ 1506 ਗੈਂਗਸਟਰ ਸਰਗਰਮ ਹਨ,750 ਪੁਲਿਸ ਦੀ ਪਕੜ ਤੋਂ ਬਾਹਰ ਹਨ।
25 ਅਪਰਾਧੀ ਵਿਦੇਸ਼ ਤੋਂ ਕਾਰੋਬਾਰ ਚਲਾ ਰਹੇ ਹਨ। 178 ਗੈਂਗਸਟਰ ਏ ਪਲੱਸ ਵਰਗ ਦੇ।
ਇਕਲੌਤੇ ਬੱਚੇ ਵਾਲੇ ਪਰਿਵਾਰ ਗੈਂਗਸਟਰਾਂ ਦਾ ਬਣਨ ਲੱਗੇ ਮੁੱਖ ਨਿਸ਼ਾਨਾ।
ਬਹੁਤ ਸਾਰੇ ਵਪਾਰੀ ਪੰਜਾਬ ਤੋਂ ਬਾਹਰ ਕਾਰੋਬਾਰ ਸ਼ਿਫਟ ਕਰਨ ਲੱਗੇ।
ਗੈਂਗਸਟਰ ਬੱਚਿਆਂ ਦੀ‌ ਰੋਜ਼ਮਰਾ ਜ਼ਿੰਦਗੀ ਉੱਤੇ ਰੱਖ ਰਹੇ ਹਨ ਨਜ਼ਰ।
ਇੱਕ ਵਪਾਰੀ ਦੇ ਘਰ ਪੁੱਤ ਦੀ ਫੋਟੋ ਅਤੇ ਨਾਲ ਬੰਦੂਕ ਦੀ ਗੋਲੀ ਵਾਲਾ ਪਾਰਸਲ ਭੇਜਿਆ।

ਪੰਜਾਬ ਦੀ ਫਿਜ਼ਾ ਅੰਦਰ ਉਦਾਸੀ ਹੈ। ਪੰਜਾਬੀਆਂ ਦੇ ਚਿਹਰੇ ਦਾ ਜਲੌਅ ਗਾਇਬ ਹੈ। ਰੰਗਦਾਰ ਕੰਧਾਂ ਬਦਰੰਗ ਦਿਸਣ ਲੱਗੀਆਂ ਹਨ। ਰੁੱਖਾਂ ਦੀ ਹਰਿਆਲੀ ਦਿਲ ਨੂੰ ਚੰਗੀ ਨਹੀਂ ਲੱਗ ਰਹੀ ਹੈ। ਸੂਰਜ ਦੀ ਧੁੱਪ ਵੀ ਫਿੱਕੀ ਲਗਦੀ ਹੈ। ਸ਼ਾਇਦ ਹੀ ਕਿਸੇ ਦਾ ਦਿਲ ਕਹਿਣ ਨੂੰ ਮੰਨਿਆ ਹੋਵੇ ਕਿ ਅੱਜ ਦਿਨ ਚੜ੍ਹਿਆ ਤੇਰੇ ਰੰਗ ਵਰਗਾ!

ਪੰਜਾਬ ਵਿੱਚ ਹੋ ਰਹੇ ਕਤਲਾਂ ਅਤੇ ਨਿੱਤ ਮੰਗੀਆਂ ਜਾਂਦੀਆਂ ਫਿਰੌਤੀਆਂ ਨੇ ਪੰਜਾਬੀ ਨੂੰ ਇੱਕ ਨਵੇਂ ਮੋੜ ’ਤੇ ਲਿਆ ਖੜ੍ਹਾ ਕੀਤਾ ਹੈ। ਤਰਨਤਾਰਨ ਜ਼ਿਲ੍ਹੇ ਵਿੱਚ ਡੇਢ ਮਹੀਨੇ ਵਿੱਚ ਦੋਂਹ ਸਰਪੰਚਾਂ ਦੇ ਹੋਏ ਕਤਲ ਨੇ ਪੁਰਾਣਾ ਸਮਾਂ ਯਾਦ ਕਰਾ ਦਿੱਤਾ ਹੈ। ਲੋਕ ਘਰ ਬਾਰ ਛੱਡ ਕੇ ਦੂਜੇ ਸੂਬਿਆਂ ਨੂੰ ਭੱਜਣ ਲੱਗੇ ਹਨ। ਦਿਨ ਵੇਲੇ ਧਮਕੀ ਦਾ ਫ਼ੋਨ ਆਉਂਦਾ ਹੈ ਅਤੇ ਰਾਤ ਨੂੰ ਘਰ ਦੇ ਬਾਹਰ ਬੰਦੂਕਾਂ ਦੀ ਤਾੜ ਤਾੜ ਕੰਨੀ ਪੈਂਦੀ ਹੈ। ਸਮਾਂ ਕਿੱਥੇ ਆ ਖੜ੍ਹਿਆ ਹੈ। ਰਾਤ ਨੂੰ ਧਮਕੀ ਤੇ ਸਵੇਰੇ ਪਾਰਸਲ ਵਿੱਚ ਬੇਟੇ ਦੀ ਫੋਟੋ ਅਤੇ ਗੋਲੀ। ਰਾਤ ਨੂੰ ਗੋਲੀਆਂ ਦੀ ਦਹਿਸ਼ਤ ਅਤੇ ਮਗਰੇ ਤੁਹਾਡੇ ਵਟਸਐਪ ’ਤੇ ਘਰ ਦੇ ਬਾਹਰਲੇ ਹਾਲਾਤ ਦੀ ਵੀਡੀਓ। ਕਈ ਪੱਖਾਂ ਤੋਂ ਪੁਰਾਣੇ ਕਾਲੇ ਦੌਰ ਦੇ ਸਮੇਂ ਅਤੇ ਇਸ ਨਵੇਂ ਦਹਿਸ਼ਤਗਰਦੀ ਦੇ ਦੌਰ ਨੂੰ ਮੇਲਿਆ ਨਹੀਂ ਜਾ ਸਕਦਾ। ਜਾਨਾਂ ਉਦੋਂ ਵੀ ਉੰਨੀਆਂ ਕੀਮਤੀ ਸਨ ਤੇ ਬੰਦੇ ਦਾ ਮੁੱਲ ਅੱਜ ਵੀ ਉੰਨਾ ਹੈ। ਉਦੋਂ ਕੋਈ ਵਜਾਹ ਸੀ, ਅੱਜ ਭਟਕਣ ਹੈ।

ਮੀਡੀਆ ਦੀ ਇੱਕ ਰਿਪੋਰਟ ਮੁਤਾਬਿਕ ਗੈਂਗਸਟਰ ਇਕਲੌਤੀ ਸੰਤਾਨ ਵਾਲੇ ਵਪਾਰੀਆਂ ਨੂੰ ਨਿਸ਼ਾਨਾ ਬਣਾਉਣ ਲੱਗੇ ਹਨ। ਵਜਾਹ ਸਾਫ ਹੈ। ਅਜਿਹੇ ਪਰਿਵਾਰ ਜਲਦੀ ਡਰ ਜਾਂਦੇ ਹਨ। ਇਕੱਲੇ ਬੇਟੇ ਦੀ ਸੁਰੱਖਿਆ ਸਭ ਤੋਂ ਵੱਡੀ ਚਿੰਤਾ ਬਣਦੀ ਹੈ। ਕਈ ਵਿਚਾਰੇ ਤਾਂ ਸੂਹ ਵੀ ਨਹੀਂ ਨਿਕਲਣ ਦਿੰਦੇ। ਆਪਣੇ ਮੂੰਹ ਦੀ ਖੋਹ ਕੇ ਗੈਂਗਸਟਰਾਂ ਦੀ ਝੋਲੀ ਪਾ ਦਿੰਦੇ ਹਨ।

ਰਿਪੋਰਟ ਵਿੱਚ ਪੰਜ ਅਜਿਹੇ ਮਾਮਲਿਆਂ ਦਾ ਜ਼ਿਕਰ ਕੀਤਾ ਗਿਆ ਹੈ ਜਿਨ੍ਹਾਂ ਵਿੱਚ ਇੱਕ ਬਿਲਡਰ, ਇੱਕ ਸੁਨਿਆਰਾ, ਇੱਕ ਡਾਕਟਰ ਅਤੇ ਦੋ ਹੋਰ ਲੋਕ ਹਨ। ਪੀੜਿਤ ਪਰਿਵਾਰਾਂ ਦਾ ਕਹਿਣਾ ਹੈ ਕਿ ਧਮਕੀ ਦੇਣ ਵਾਲੇ ਦੇ ਕੋਲ ਉਹਨਾਂ ਦੀ ਨਿੱਜੀ ਜਾਣਕਾਰੀ ਹੁੰਦੀ ਹੈ। ਇੱਥੋਂ ਤਕ ਕਿ ਉਹ ਬੇਟੇ ਦੀਆਂ ਦਿਨ ਭਰ ਦੀਆਂ ਗਤੀਵਿਧੀਆਂ ਉੱਤੇ ਨਜ਼ਰ ਵੀ ਰੱਖਦੇ ਹਨ। ਬੇਟਾ ਕਿੱਥੋਂ ਗਿਆ ਸੀ, ਕਿੱਥੋਂ ਆਇਆ ਹੈ, ਹੁਣ ਕਿੱਥੇ ਹੈ - ਬੱਚਿਆਂ ਦੇ ਪਲ ਪਲ ਦਾ ਉਹਨਾਂ ਕੋਲ ਰਿਕਾਰਡ ਹੁੰਦਾ ਹੈ।

ਰਿਪੋਰਟ ਮੁਤਾਬਿਕ ਜਲੰਧਰ ਸ਼ਹਿਰ ਅਤੇ ਆਲੇ ਦੁਆਲੇ 14 ਮਹੀਨਿਆਂ ਦੇ ਅੰਦਰ ਫਿਰੌਤੀ ਦੇ 25 ਮਾਮਲੇ ਸਾਹਮਣੇ ਆਏ ਹਨ। ਇਨ੍ਹਾਂ ਵਿੱਚੋਂ ਪੰਜ ਵੱਡੇ ਘਰਾਣੇ ਦੱਸੇ ਗਏ ਹਨ। ਹੋਰ ਤਾਂ ਹੋਰ ਸ਼ਿਕਾਇਤਕਰਤਾਵਾਂ ਵਿੱਚੋਂ ਛੇ ਮਾਮਲਿਆਂ ਵਿੱਚ ਇਕੱਲੀ ਔਲਾਦ ਵਾਲੇ ਪਰਿਵਾਰ ਹਨ। ਸਭ ਨੂੰ ਆਪਣਾ ਵੰਸ਼ ਖ਼ਤਮ ਹੋਣ ਦਾ ਡਰ ਖਾ ਰਿਹਾ ਹੈ। ਰਿਪੋਰਟ ਵਿੱਚ ਇੱਕ ਅਜਿਹੇ ਵਪਾਰੀ ਦਾ ਜ਼ਿਕਰ ਕੀਤਾ ਗਿਆ ਹੈ ਜਿਸਨੇ ਫਿਰੌਤੀ ਦੀ 75 ਲੱਖ ਦੀ ਰਕਮ ਦੇ ਕੇ ਆਪਣਾ ਕਾਰੋਬਾਰ ਡੁਬਈ ਸ਼ਿਫਟ ਕਰਨਾ ਸ਼ੁਰੂ ਕਰ ਦਿੱਤਾ ਹੈ। ਇੱਕ ਹੋਰ ਵਪਾਰੀ ਦਾ ਵੀ ਜ਼ਿਕਰ ਹੈ, ਜਿਸਦਾ ਇੱਕ ਹੀ ਬੇਟਾ ਹੈ। ਉਸਦੇ ਘਰ ਉਹਨਾਂ ਦੇ ਆਪਣੇ ਬੇਟੇ ਦੀ ਫੋਟੋ ਤੇ ਬੰਦੂਕ ਦੀ ਗੋਲੀ ਦਾ ਪਾਰਸਲ ਆਉਂਦਾ ਹੈ। ਨਾਲ ਹੀ 50 ਲੱਖ ਦੀ ਫਿਰੌਤੀ ਦੀ ਸ਼ਰਤ ਰੱਖੀ ਗਈ ਹੈ।

ਸੁਰੱਖਿਆ ਏਜੰਸੀਆਂ ਮੁਤਾਬਿਕ ਪੰਜਾਬ ਵਿੱਚ 1506 ਗੈਂਗਸਟਰ ਸਰਗਰਮ ਹਨ। ਇਨ੍ਹਾਂ ਵਿੱਚੋਂ 750 ਤੋਂ ਵੱਧ ਪੁਲਿਸ ਦੀ ਪਕੜ ਤੋਂ ਬਾਹਰ‌ ਹਨ। 500 ਦੇ ਕਰੀਬ ਨੂੰ ਜੇਲ੍ਹ ਵਿੱਚ ਡੱਕਿਆ ਚੁੱਕਾ ਹੈ। 178 ਗੈਂਗਸਟਰ ਸਭ ਤੋਂ ਖਤਰਨਾਕ ਏ ਪਲੱਸ ਕੈਟਾਗਰੀ ਦੇ ਦੱਸੇ ਗਏ ਹਨ। ਅਲੱਗ ਅਲੱਗ ਗੈਂਗਾਂ ਦੇ 25 ਅਪਰਾਧੀ ਵਿਦੇਸ਼ ਤੋਂ ਕਾਰੋਬਾਰ ਚਲਾ ਰਹੇ ਹਨ। ਸਭ ਤੋਂ ਵੱਧ ਗੈਂਗਸਟਰ 450 ਸਰਹੱਦੀ ਇਲਾਕਿਆਂ ਵਿੱਚ ਹਨ। ਅੰਮ੍ਰਿਤਸਰ ਰੂਰਲ ਵਿੱਚ ਕੰਮ ਕਰਨ ਵਾਲੇ ਗੈਂਗਸਟਰਾਂ ਦੀ ਗਿਣਤੀ 202 ਅਤੇ ਤਰਨ ਤਾਰਨ ਵਿੱਚ 252 ਦੱਸੀ ਗਈ ਹੈ।

‌ਬੰਬੀਹਾ ਗੈਂਗ ਪੰਜਾਬ ਵਿੱਚ ਸਭ ਤੋਂ ਉੱਪਰ ਚੱਲ ਰਿਹਾ ਹੈ ਜਿਸ ਵਿੱਚ 421 ਗੈਂਗਸਟਰ ਹਨ। ਇਨ੍ਹਾਂ ਵਿੱਚੋਂ 87 ਤਰਨਤਾਰਨ ਅਤੇ 90 ਅੰਮ੍ਰਿਤਸਰ ਰੂਰਲ ਵਿੱਚ ਸਰਗਰਮ ਹਨ। ਦੂਜਾ ਸਭ ਤੋਂ ਵੱਡਾ ਗੈਂਗ ਰਿੰਦਾ ਲੰਡਾ ਦਾ ਦੱਸਿਆ ਜਾ ਰਿਹਾ ਹੈ। ਇਸ ਕੋਲ 308 ਗੈਂਗਸਟਰਾਂ ਦੀ ਟੀਮ ਹੈ। ਸਭ ਤੋਂ ਵੱਧ ਤਰਨਤਾਰਨ ਵਿੱਚ 107 ਅਤੇ ਗੁਰਦਾਸਪੁਰ ਵਿੱਚ 43 ਦਰਜ ਹਨ। ਤੀਜਾ ਵੱਡਾ ਗੈਂਗ ਗੋਲਡੀ ਬਰਾੜ ਦਾ ਹੈ। ਇਸ ਗੈਂਗ ਵਿੱਚ 206 ਗੈਂਗਸਟਰ ਹਨ। ਜੱਗੂ ਭਗਵਾਨਪੁਰੀਆ ਦੇ ਗੈਂਗ ਵਿੱਚ 161 ਗੈਂਗਸਟਰ ਹਨ ਅਤੇ ਲਾਰੈਂਸ ਗੈਂਗ ਵਿੱਚ 129 ਗੈਂਗਸਟਰ ਦੱਸੇ ਗਏ ਹਨ।

ਰਿਪੋਰਟ ਵਿੱਚ ਇੱਕ ਹੋਰ ਖੁਲਾਸਾ ਕੀਤਾ ਗਿਆ ਹੈ ਕਿ ਜਿਹੜੇ ਗੈਂਗਸਟਰ ਵਿਦੇਸ਼ ਤੋਂ ਸਰਗਰਮੀਆਂ ਚਲਾ ਰਹੇ ਹਨ ਉਹਨਾਂ ਵਿੱਚ ਤਰਨਤਰਨ ਦੇ ਸੱਤ, ਅੰਮ੍ਰਿਤਸਰ ਰੂਰਲ ਦੇ ਚਾਰ, ਬਟਾਲਾ ਦੇ ਤਿੰਨ, ਲੁਧਿਆਣਾ ਕਮਿਸ਼ਨਰੇਟ ਅਤੇ ਹੁਸ਼ਿਆਰਪੁਰ ਦੇ ਦੋ ਦੋ, ਮੋਗਾ ਦੇ ਤਿੰਨ ਅਤੇ ਫਤਿਹਗੜ੍ਹ ਸਾਹਿਬ, ਫਿਰੋਜ਼ਪੁਰ, ਸ੍ਰੀ ਮੁਕਤਸਰ ਸਾਹਿਬ, ਅਤੇ ਐੱਸ ਬੀ ਐੱਸ ਨਗਰ ਦਾ ਇੱਕ ਇੱਕ ਸ਼ਾਮਲ ਹੈ। ਭਾਵ ਕਿ 25 ਗੈਂਗਸਟਰ ਵਿਦੇਸ਼ ਤੋਂ ਅਪਰੇਟ ਕਰ ਰਹੇ ਹਨ।

ਇਸ ਸਮੇਂ ਪੰਜਾਬ ਦਾ ਰੱਬ ਹੀ ਰਾਖਾ ਹੈ ਜਿੱਥੇ ਹਰ ਰੋਜ਼ ਸਕੂਲਾਂ, ਕਚਹਿਰੀਆਂ, ਹਸਪਤਾਲ ਅਤੇ ਸਕੱਤਰੇਤ ਨੂੰ ਉਡਾਉਣ ਦੀਆਂ ਨਿੱਤ ਧਮਕੀਆਂ ਆਉਂਦੀਆਂ ਹਨ। ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਨੂੰ ਵੀ ਜਾਨੋ ਮਾਰਨ ਦੀ ਧਮਕੀ ਮਿਲਦੀ ਹੈ। ਚੰਡੀਗੜ੍ਹ ਵੀ ਇਨ੍ਹਾਂ ਧਮਕੀਆਂ ਤੋਂ ਅਭਿੱਜ ਨਹੀਂ ਰਿਹਾ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਗੈਂਗਸਟਰਾਂ ਵੱਲੋਂ ਈਮੇਲ ਰਾਹੀਂ ਬੰਬ ਧਮਕੀਆਂ ਦੇਣ ਦਾ ਡਰਾਮਾ ਮਹੀਨਿਆਂ ਤੋਂ ਚੱਲ ਰਿਹਾ ਹੈ। ਸਦਕੇ ਜਾਈਏ ਸਰਕਾਰ ਅਤੇ ਪੁਲਿਸ ਦੇ ਸਾਈਬਰ ਵਿਭਾਗ ਦੇ ਜਿਨ੍ਹਾਂ ਨੂੰ ਹਾਲੇ ਤਕ ਇਹ ਨਹੀਂ ਪਤਾ ਲੱਗ ਸਕਿਆ ਕਿ ਈਮੇਲ ਕੌਣ ਭੇਜ ਰਿਹਾ ਹੈ, ਧਮਕੀਆਂ ਕਿੱਥੋਂ ਆ ਰਹੀਆਂ ਹਨ। ਅਜਿਹੀ ਸਰਕਾਰ ਅਤੇ ਉਸਦੀ ਪੁਲਿਸ ਤੋਂ ਲੋਕਾਂ ਦੇ ਜਾਨ ਮਾਲ ਦੀ ਸੁਰੱਖਿਆ ਦੀ ਕਿਸ ਮਨ ਨਾਲ ਆਸ ਕਰ ਲਈਏ। ਜਿਸ ਤਨ ਲਾਗੇ ਸੋ ਤਨ ਜਾਣੇ, ਕੌਣ ਜਾਣੇ ਪੀੜ ਪਰਾਈ।

ਸੱਚ ਤਾਂ ਇਹ ਹੈ ਕਿ ਪੰਜਾਬ ਸਰਕਾਰ ਚਾਰੇ ਪਾਸੇ ਤੋਂ ਵਿੰਨ੍ਹੀ ਪਈ ਹੈ। ਸਰਕਾਰ ਦੇ ਪੱਲੇ ਕੁਝ ਨਹੀਂ ਪੈ ਰਿਹਾ ਲਗਦਾ। ਕਦੇ ਉਹ ਨਸ਼ੇ ਖ਼ਤਮ ਕਰਨ ਵੱਲ ਨੂੰ ਦੌੜਦੀ ਹੈ, ਕਦੇ ਗੈਂਗਸਟਰਾਂ ਨੂੰ ਮਾਰ ਮੁਕਾਉਣ ਵੱਲ ਤੁਰਦੀ ਹੈ। ਭ੍ਰਿਸ਼ਟਾਚਾਰ ਨੂੰ ਖ਼ਤਮ ਕਰਨ ਦੀ ਵੀ ਦੌੜ ਲੱਗੀ ਹੋਈ ਹੈ। ਰੇਤ ਮਾਫ਼ੀਆ ਤਾਂ ਕਿਤੇ ਪਿੱਛੇ ਰਹਿ ਗਿਆ ਹੈ। ਅਸਲ ਵਿੱਚ ਬਦਲਾਅ ਦੇ ਨਾਂ ਉੱਤੇ ਸੱਤਾ ਵਿੱਚ ਆਈ ਆਮ ਆਦਮੀ ਪਾਰਟੀ ਨੇ ਪੰਜਾਬੀਆਂ ਨੂੰ ਸਬਜ਼ਬਾਗ ਇੰਨੇ ਦਿਖਾਏ ਸਨ ਕਿ ਉਹ ਵੱਡੀਆਂ ਉਮੀਦਾਂ ਲਾ ਬੈਠੇ ਪਰ ਸਰਕਾਰ ਮੁਸ਼ਕਿਲਾਂ ਦੇ ਦਰਿਆ ਵਿੱਚ ਗੋਤੇ ਖਾਣ ਲੱਗ ਪਈ ਹੈ। ਸਰਕਾਰ ਤਾਰੂ ਨਹੀਂ, ਅਫਸਰਸ਼ਾਹੀ ਹੱਥ ਨਹੀਂ ਫੜਾ ਰਹੀ।

*       *       *       *       *

ਹਰ ਲੇਖਕ ‘ਸਰੋਕਾਰ’ ਨੂੰ ਭੇਜੀ ਗਈ ਰਚਨਾ ਦੀ ਕਾਪੀ ਆਪਣੇ ਕੋਲ ਸੰਭਾਲਕੇ ਰੱਖੇ।
ਪਾਠਕਾਂ ਨਾਲ ਆਪਣੇ ਵਿਚਾਰ ਸਾਂਝੇ ਕਰਨ ਲਈ ਸਰੋਕਾਰ ਨਾਲ ਸੰਪਰਕ ਕਰੋ: (This email address is being protected from spambots. You need JavaScript enabled to view it.)