“ਜੇਕਰ ਭਗਵੰਤ ਮਾਨ ਅਤੇ ਦਿੱਲੀ ਵਾਲੇ ਆਹਮਣੇ ਸਾਹਮਣੇ ਹੋ ਗਏ ਤਾਂ ਪੰਜਾਬ ਦੇ ਲੋਕ ...”
(7 ਸਤੰਬਰ 2025)
ਦਿੱਲੀ ਵਾਲਿਆਂ ਦੀ ਨਿਗਾਹ ਪੰਜਾਬ ਦੇ ਖਜ਼ਾਨੇ ਉੱਤੇ
“ਪੰਜਾਬ ਦੇ ਮੁੱਖ ਮੰਤਰੀ ਨੂੰ ਬਦਲ ਦਿੱਤਾ ਜਾਵੇਗਾ, ਉਸਦੀ ਥਾਂ ਨਵਾਂ ਮੁੱਖ ਮੰਤਰੀ ਪੰਜਾਬ ਦੀ ਵਾਗਡੋਰ ਸੰਭਾਲੇਗਾ। ਇਹ ਤਿਆਰੀ ਮੁਕੰਮਲ ਹੋ ਚੁੱਕੀ ਹੈ। ਕਿਸੇ ਵੇਲੇ ਵੀ ਅਜਿਹਾ ਕੀਤਾ ਜਾ ਸਕਦਾ ਹੈ।” ਇਹ ਚਰਚਾ ਤਾਂ ਭਾਵੇਂ ਲੰਬੇ ਸਮੇਂ ਤੋਂ ਚਲਦੀ ਆ ਰਹੀ ਹੈ ਪਰ ਪਿਛਲੇ ਕੁਝ ਦਿਨਾਂ ਤੋਂ ਇਸਨੇ ਕਾਫ਼ੀ ਜ਼ੋਰ ਫੜ ਲਿਆ ਹੈ। ਸਮੁੱਚਾ ਰਾਜ ਅੱਜ ਹੜ੍ਹਾਂ ਦੀ ਮਾਰ ਕਾਰਨ ਬਹੁਤ ਦੁੱਖ ਭੋਗ ਰਿਹਾ ਹੈ। ਫ਼ਸਲਾਂ ਮਰ ਗਈਆਂ ਹਨ, ਘਰ ਢਹਿ ਗਏ ਹਨ, ਮੌਤਾਂ ਹੋ ਰਹੀਆਂ ਹਨ, ਪਸ਼ੂਧਨ ਰੁੜ੍ਹ ਗਿਆ ਹੈ, ਘਰ ਉੱਜੜ ਗਏ ਹਨ, ਬਿਮਾਰੀਆਂ ਫੈਲਣ ਦਾ ਖਤਰਾ ਸਿਰ ’ਤੇ ਮੰਡਲਾ ਰਿਹਾ ਹੈ। ਜੋ ਹੜ੍ਹਾਂ ਦੀ ਮਾਰ ਤੋਂ ਬਚੇ ਹਨ, ਉਹ ਪੀੜਿਤਾਂ ਦੀ ਹਰ ਸੰਭਵ ਮਦਦ ਕਰਨ ਵਿੱਚ ਰੁੱਝੇ ਹੋਏ ਹਨ। ਹੈਰਾਨੀ ਹੁੰਦੀ ਹੈ ਕਿ ਜਦੋਂ ਅਜਿਹੇ ਹਾਲਾਤ ਵਿੱਚ ਇਹ ਸੁਣਦੇ ਹਾਂ, ਆਥਣ ਸਵੇਰ ਨੂੰ ਮੁੱਖ ਮੰਤਰੀ ਬਦਲਿਆ ਜਾ ਸਕਦਾ ਹੈ। ਇਹ ਤਾਂ ਉਸ ਕਹਾਵਤ ਨੂੰ ਹੀ ਸੱਚ ਕੀਤਾ ਜਾ ਰਿਹਾ ਹੈ ਕਿ ‘ਰੋਮ ਸੜ ਰਿਹਾ ਸੀ ਤੇ ਨੀਰੋ ਬੰਸਰੀ ਵਜਾਹ ਰਿਹਾ ਸੀ।’ ਮੀਡੀਆ ਦੇ ਇੱਕ ਹਿੱਸੇ ਨੇ ਤਾਂ ਦੋ ਵਿਧਾਇਕਾਂ ਦੇ ਨਾਂ ਵੀ ਨਸ਼ਰ ਕਰ ਦਿੱਤੇ ਹਨ ਕਿ ਉਹਨਾਂ ਵਿੱਚੋਂ ਇੱਕ ਨੂੰ ਜਲਦੀ ਸਹੁੰ ਚੁਕਾਈ ਜਾਵੇਗੀ।
ਸਵਾਲ ਉੱਠਦਾ ਹੈ ਕਿ ਕੀ ਅਜਿਹਾ ਹੋ ਸਕਦਾ ਹੈ? ਇਸ ਵਿੱਚ ਕੋਈ ਸ਼ੱਕ ਨਹੀਂ ਕਿ ਸਿਆਸਤ ਵਿੱਚ ਸਭ ਕੁਝ ਸੰਭਵ ਹੈ ਪਰ ਅਜਿਹੀ ਅਦਲਾ ਬਦਲੀ ਲਈ ਸਮਾਂ ਅਤੇ ਹਾਲਾਤ ਵੀ ਵੇਖੇ ਜਾਣੇ ਜ਼ਰੂਰੀ ਹੁੰਦੇ ਹਨ ਅਤੇ ਵੇਖੇ ਵੀ ਜਾਂਦੇ ਹਨ। ਅੰਨ੍ਹੇਵਾਹ ਕੀਤਾ ਫੈਸਲਾ ਕਈ ਵਾਰ ਲਾਭ ਦੀ ਬਜਾਏ ਨੁਕਸਾਨ ਵੀ ਪਹੁੰਚਾ ਸਕਦਾ ਹੈ। ਇਹ ਗੱਲ ਵੀ ਸਾਫ਼ ਹੈ ਕਿ ਪੰਜਾਬ ਦਾ ਮੌਜੂਦਾ ਮੁੱਖ ਮੰਤਰੀ ਸ੍ਰੀ ਭਗਵੰਤ ਮਾਨ ਉੰਨਾ ਸਫ਼ਲ ਨਹੀਂ ਹੋ ਸਕਿਆ, ਜਿੰਨੀਆਂ ਉਸ ਤੋਂ ਉਮੀਦਾਂ ਸਨ। ਜਦੋਂ ਸਰਕਾਰ ਹੋਂਦ ਵਿੱਚ ਆਈ ਸੀ, ਉਸ ਸਮੇਂ ਹੀ ਬੁੱਧੀਜੀਵੀਆਂ ਅਤੇ ਸਿਆਸੀ ਮਾਹਰਾਂ ਨੇ ਇਹ ਪੇਸ਼ਨਗੋਈ ਕਰ ਦਿੱਤੀ ਸੀ ਕਿ ਭਗਵੰਤ ਸਫ਼ਲ ਨਹੀਂ ਹੋ ਸਕੇਗਾ। ਉਹਨਾਂ ਅਨੁਸਾਰ ਭਗਵੰਤ ਮਾਨ ਬਹੁਤਾ ਪੁਰਾਣਾ ਸਿਆਸਤਦਾਨ ਨਹੀਂ ਸੀ ਅਤੇ ਪ੍ਰਬੰਧਾਂ ਬਾਰੇ ਵੀ ਉਸਦਾ ਕੋਈ ਤਜਰਬਾ ਨਹੀਂ ਸੀ। ਹੋਰ ਪਾਰਟੀਆਂ ਦੇ ਆਗੂਆਂ ਦੇ ਮੁਕਾਬਲੇ ਤਾਂ ਉਹ ਸਿਆਸੀ ਤੌਰ ’ਤੇ ਬਾਲ ਅਵਸਥਾ ਵਿੱਚ ਹੀ ਸੀ। ਕਾਂਗਰਸ, ਭਾਜਪਾ, ਅਕਾਲੀ ਦਲ, ਖੱਬੀਆਂ ਪਾਰਟੀਆਂ ਵਿੱਚ ਤਾਂ ਅਜਿਹੇ ਆਗੂ ਬੈਠੇ ਹਨ, ਜਿਨ੍ਹਾਂ ਦਾ ਸਿਆਸੀ ਤਜਰਬਾ ਸੱਠ ਸੱਤਰਾਂ ਨੂੰ ਟੱਪ ਚੁੱਕਾ ਹੈ ਜਦੋਂ ਕਿ ਭਗਵੰਤ ਮਾਨ ਦੀ ਤਾਂ ਉਮਰ ਨੇ ਹੀ ਅਜੇ ਪੰਜਾਹ ਨੂੰ ਪਾਰ ਕੀਤਾ ਹੈ। ਪਾਰਟੀਆਂ ਦੇ ਤੌਰ ’ਤੇ ਦੇਖਿਆ ਜਾਵੇ ਤਾਂ ਦੂਜੀਆਂ ਪਾਰਟੀਆਂ ਦੀ ਉਮਰ ਸੌ ਸੌ ਸਾਲ ਹੋ ਚੁੱਕੀ ਹੈ, ਜਦੋਂ ਕਿ ਆਮ ਆਦਮੀ ਪਾਰਟੀ ਤਾਂ ਅਜੇ ਨਬਾਲਗਾਂ ਵਾਲੀ ਉਮਰ ਵਿੱਚ ਹੀ ਤੁਰੀ ਫਿਰਦੀ ਹੈ। ਕਲਾਕਾਰੀ, ਗਾਉਣ ਵਜਾਉਣ ਅਤੇ ਸਿਆਸਤ ਦਾ ਬਹੁਤ ਅੰਤਰ ਹੁੰਦਾ ਹੈ। ਇਹੋ ਕਾਰਨ ਸੀ ਕਿ ਭਗਵੰਤ ਮਾਨ ਨੂੰ ਆਪਣੇ ਸਲਾਹਕਾਰਾਂ ਜਾਂ ਅਫਸਰਾਂ ’ਤੇ ਹੀ ਨਿਰਭਰ ਰਹਿਣਾ ਪਿਆ ਹੈ।
ਅਜਿਹੀ ਸਥਿਤੀ ਦੇ ਬਾਵਜੂਦ ਵੀ ਪੰਜਾਬ ਦੇ ਲੋਕ ਕਹਿੰਦੇ ਰਹੇ ਕਿ ਭਗਵੰਤ ਮਾਨ ਪੰਜਾਬ ਲਈ ਬਹੁਤ ਕੁਝ ਕਰਨਾ ਚਾਹੁੰਦਾ ਹੈ, ਪਰ ਤਜਰਬੇ ਦੀ ਕਮੀ ਅਤੇ ਹਾਈਕਮਾਂਡ ਦੀ ਬੇਲੋੜੀ ਦਖ਼ਲਅੰਦਾਜ਼ੀ ਅੜਿੱਕਾ ਬਣ ਰਹੀਆਂ ਹਨ। ਉਸਦੀ ਇਮਾਨਦਾਰੀ ’ਤੇ ਵੀ ਲੋਕ ਕੋਈ ਸ਼ੱਕ ਨਹੀਂ ਕਰ ਰਹੇ। ਭ੍ਰਿਸ਼ਟਾਚਾਰੀ ਦੇ ਦੋਸ਼ ਲੱਗਣ ਸਮੇਂ ਤਾਂ ਉਸਨੇ ਨਾ ਆਪਣੀ ਪਾਰਟੀ ਦੇ ਵਿਧਾਇਕਾਂ ਜਾਂ ਅਹੁਦੇਦਾਰਾਂ ਨੂੰ ਬਖ਼ਸਿਆ ਅਤੇ ਨਾ ਹੀ ਅਫਸਰਾਂ ਮੁਲਾਜ਼ਮਾਂ ਨੂੰ। ਪਾਰਟੀ ਦੀ ਹਾਈਕਮਾਂਡ ਨੂੰ ਸ਼ਾਇਦ ਉਸਦੀ ਭ੍ਰਿਸ਼ਟਾਚਾਰ ਰੋਕਣ ਵਾਲੀ ਨੀਤੀ ਵੀ ਰਾਸ ਨਹੀਂ ਸੀ ਆ ਰਹੀ, ਇਸੇ ਕਰਕੇ ਉਹਨਾਂ ਮੁੱਖ ਮੰਤਰੀ ਦੇ ਖੰਭ ਕੱਟਣ ਲਈ ਪੰਜਾਬ ਦੇ ਸਾਰੇ ਮਹਿਕਮਿਆਂ ਵਿੱਚ ਹਾਈਕਮਾਂਡ ਨੇ ਦਿੱਲੀ ਜਾਂ ਪੰਜਾਬ ਤੋਂ ਬਾਹਰਲੇ ਹੋਰ ਆਗੂਆਂ ਨੂੰ ਬਿਠਾ ਦਿੱਤਾ। ਇਸ ਮਾਮਲੇ ’ਤੇ ਵੀ ਭਗਵੰਤ ਮਾਨ ਦੀ ਇਹ ਕਮਜ਼ੋਰੀ ਰਹੀ ਕਿ ਉਹ ਚੁੱਪ ਕਰਕੇ ਅਜਿਹਾ ਬਰਦਾਸ਼ਤ ਕਰਦਾ ਰਿਹਾ। ਉਸਨੇ ਕੋਈ ਵਿਰੋਧ ਨਾ ਕੀਤਾ। ਹਾਈਕਮਾਂਡ ਵਾਲੇ ਪੰਜਾਬ ਦੇ ਖਜ਼ਾਨੇ ’ਤੇ ਬੋਝ ਬਣ ਗਏ। ਉਹ ਸੂਬੇ ਦੀਆਂ ਰਕਮਾਂ ਪੰਜਾਬ ਤੋਂ ਬਾਹਰ ਖਰਚਣ ਲੱਗੇ। ਪੰਜਾਬ ਦਾ ਖਜ਼ਾਨਾ ਲੁੱਟਿਆ ਜਾਣ ਲੱਗਾ। ਬਾਹਰਲੇ ਇਹ ਆਗੂ ਪੰਜਾਬ ਵਿੱਚੋਂ ਪੈਸਾ ਵੀ ਲੁੱਟ ਕੇ ਲਿਜਾਣ ਲੱਗੇ ਅਤੇ ਐਸ਼ ਪ੍ਰਸ਼ਤੀ ਵੀ ਕਰਨ ਲੱਗੇ। ਪੰਜਾਬ ਦੇ ਲੋਕਾਂ ਨੇ ਅਜਿਹਾ ਹੁੰਦਾ ਦੇਖ ਕੇ ਰੌਲਾ ਵੀ ਪਾਇਆ ਅਤੇ ਇਤਰਾਜ਼ ਵੀ ਕੀਤਾ ਪਰ ਭਗਵੰਤ ਮਾਨ ਆਪਣੀ ਕੁਰਸੀ ਬਚਾਈ ਰੱਖਣ ਲਈ ਦੜ ਵੱਟ ਕੇ ਸਮਾਂ ਲੰਘਾਉਂਦਾ ਰਿਹਾ। ਆਖ਼ਰ ਭਗਵੰਤ ਮਾਨ ਵੀ ਆਮ ਲੋਕਾਂ ਦੇ ਮਨੋਂ ਲਹਿਣ ਲੱਗ ਪਿਆ। ਜਦੋਂ ਉਸ ਨੂੰ ਇਹ ਧੱਕੇਸ਼ਾਹੀ ਪਰੇਸ਼ਾਨ ਕਰਦੀ ਤਾਂ ਉਹ ਕਦੇ ਕਦੇ ਗੁੱਸਾ ਵੀ ਪ੍ਰਗਟ ਕਰਦਾ, ਪਰ ਹਾਈਕਮਾਂਡ ਵਾਲਿਆਂ ਵੱਲੋਂ ਵਿਧਾਇਕਾਂ ’ਤੇ ਪਾਏ ਦਬਾਅ ਸਦਕਾ ਕੁਰਸੀ ਖੁੱਸਣ ਜਾਂ ਸਰਕਾਰ ਟੁੱਟਣ ਤੋਂ ਡਰਦਾ ਚੁੱਪ ਕਰ ਜਾਂਦਾ।
ਹੁਣ ਮੁੱਖ ਮੰਤਰੀ ਬਦਲਣ ਦੀ ਚਰਚਾ ਜ਼ੋਰਾਂ ’ਤੇ ਹੈ। ਹਾਈਕਮਾਂਡ ਜਾਂ ਕਹਿ ਲਈਏ ਦਿੱਲੀ ਵਾਲੇ ਤਾਂ ਇਸ ਤਾਕ ਵਿੱਚ ਕਾਫ਼ੀ ਦੇਰ ਤੋਂ ਹਨ ਕਿ ਭਗਵੰਤ ਮਾਨ ਨੂੰ ਜਿੰਨੀ ਲੋੜ ਸੀ ਵਰਤ ਲਿਆ ਹੈ, ਹੁਣ ਉਹਨਾਂ ਮੁਤਾਬਕ ਚੱਲਣ ਵਾਲੇ ਕਿਸੇ ਹੋਰ ਨੂੰ ਲਿਆਂਦਾ ਜਾਵੇ। ਪੰਜਾਬ ਦੇ ਲੋਕ ਇਸ ਗੱਲੋਂ ਜ਼ਰੂਰ ਚਿੰਤਤ ਹਨ ਕਿ ਜੇ ਅਜਿਹਾ ਹੋ ਗਿਆ ਤਾਂ ਦਿੱਲੀ ਵਾਲਿਆਂ ਨੂੰ ਲੁੱਟ ਮਾਰ ਕਰਨ ਦੀ ਹੁਣ ਨਾਲੋਂ ਵੀ ਜ਼ਿਆਦਾ ਖੁੱਲ੍ਹ ਮਿਲ ਜਾਵੇਗੀ। ਇਹ ਵੀ ਗੱਲ ਚੱਲ ਰਹੀ ਹੈ ਕਿ ਭਗਵੰਤ ਮਾਨ ਨਾਲੋਂ ਵੱਧ ਆਮ ਆਦਮੀ ਪਾਰਟੀ ਦਾ ਕਿਹੜਾ ਸਿਆਣਾ ਅਤੇ ਤਜਰਬੇਦਾਰ ਹੈ ਜੋ ਸਰਕਾਰ ਚਲਾਉਣ ਵਿੱਚ ਵੱਧ ਨਿਪੁੰਨ ਹੋਵੇ। ਦੂਜੀ ਗੱਲ ਇਹ ਵੀ ਹੈ ਵੇਖਣਾ ਪਵੇਗਾ ਕਿ ਪੰਜਾਬ ਵਿਧਾਨ ਸਭਾ ਦੀਆਂ ਚੋਣਾਂ ਨਜ਼ਦੀਕ ਆ ਰਹੀਆਂ ਹਨ, ਅਜਿਹੇ ਸਮੇਂ ਮੁੱਖ ਮੰਤਰੀ ਬਦਲ ਕੇ ਪਾਰਟੀ ਨੂੰ ਲਾਭ ਹੋ ਸਕਦਾ ਹੈ? ਕਾਂਗਰਸ ਨੇ ਵੀ ਵਿਧਾਨ ਸਭਾ ਦੇ ਨਜ਼ਦੀਕ ਆਉਣ ’ਤੇ ਕੈਪਟਨ ਅਮਰਿੰਦਰ ਸਿੰਘ ਨੂੰ ਬਦਲ ਕੇ ਚਰਨਜੀਤ ਸਿੰਘ ਚੰਨੀ ਨੂੰ ਮੁੱਖ ਮੰਤਰੀ ਬਣਾਇਆ ਸੀ। ਸ੍ਰੀ ਚੰਨੀ ਨੂੰ ਲੋਕਾਂ ਨੇ ਭਾਵੇਂ ਬਹੁਤ ਮਾਣ ਸਤਿਕਾਰ ਦਿੱਤਾ ਸੀ, ਪਰ ਸਿਆਸੀ ਮਾਹਰਾਂ ਦਾ ਇਹ ਵੀ ਕਹਿਣਾ ਹੈ ਕਿ ਜੇਕਰ ਕੈਪਟਨ ਅਮਰਿੰਦਰ ਸਿੰਘ ਨੂੰ ਬਦਲਿਆ ਨਾ ਜਾਂਦਾ ਤਾਂ ਕਾਂਗਰਸ ਸਰਕਾਰ ਵੀ ਬਣਾ ਸਕਦੀ ਸੀ। ਕੀ ਆਮ ਆਦਮੀ ਪਾਰਟੀ ਅਜਿਹਾ ਖਤਰਾ ਸਹੇੜ ਸਕਦੀ ਹੈ? ਇਹ ਪਾਰਟੀ ਦੀ ਸਮਝ ’ਤੇ ਹੈ ਕਿ ਉਹ ਪੰਜਾਬ ਦਾ ਪੈਸਾ ਹੀ ਬਾਹਰ ਲਿਜਾਣ ਨੂੰ ਅਧਾਰ ਬਣਾ ਰਹੀ ਹੈ ਜਾਂ ਚੋਣਾਂ ਵਿੱਚ ਚੰਗੀ ਕਾਰਗੁਜ਼ਾਰੀ ਨੂੰ।
ਇਸ ਵਿੱਚ ਵੀ ਕੋਈ ਸ਼ੱਕ ਨਹੀਂ ਕਿ ਪੰਜਾਬ ਦੇ ਲੋਕ ਭਗਵੰਤ ਮਾਨ ਨੂੰ ਮੁੱਖ ਮੰਤਰੀ ਵਜੋਂ ਅਸਫ਼ਲ ਮੰਨ ਰਹੇ ਹਨ, ਪਰ ਉਹ ਇਹ ਵੀ ਬਰਦਾਸ਼ਤ ਨਹੀਂ ਕਰ ਸਕਦੇ ਕਿ ਸੂਬੇ ਦਾ ਸਾਰਾ ਪ੍ਰਬੰਧ ਦਿੱਲੀ ਵਾਲਿਆਂ ਦੇ ਹੱਥਾਂ ਵਿੱਚ ਚਲਿਆ ਜਾਵੇ। ਪੰਜਾਬ ਦੇ ਲੋਕ ਕਦੇ ਵੀ ਦਿੱਲੀ ਵਾਲਿਆਂ ਉੱਤੇ ਵਿਸ਼ਵਾਸ ਨਹੀਂ ਕਰ ਸਕਦੇ। ਦਿੱਲੀ ਵਾਲਿਆਂ ਨੇ ਹਮੇਸ਼ਾ ਪੰਜਾਬ ਨਾਲ ਵਿਤਕਰਾ ਕੀਤਾ ਹੈ, ਪੰਜਾਬ ਨੂੰ ਆਪਣੇ ਹਿਤਾਂ ਲਈ ਵਰਤਿਆ ਹੈ, ਪਰ ਜਦੋਂ ਲੋੜ ਪਈ ਤਾਂ ਪੰਜਾਬ ਨੂੰ ਨਿਆਂ ਅਤੇ ਹੱਕ ਨਹੀਂ ਦਿੱਤੇ। ਅੱਜ ਸੱਥਾਂ ਵਿੱਚ ਇਹ ਗੱਲ ਆਮ ਕੀਤੀ ਜਾਂਦੀ ਹੈ ਕਿ ਪੰਜਾਬ ਨੂੰ ਲੁੱਟਣ ਲਈ ਕਦੇ ਮੁਗਲ ਆਏ, ਕਦੇ ਅੰਗਰੇਜ਼ ਆਏ ਅਤੇ ਹੁਣ ਫਿਰ ਇਹ ਦਿੱਲੀ ਵਾਲੇ ਆ ਪਹੁੰਚੇ ਹਨ। ਪੰਜਾਬੀ ਕਦੇ ਬਾਹਰਲਿਆਂ ਨੂੰ ਬਦਾਸ਼ਤ ਨਹੀਂ ਕਰ ਸਕਦੇ।
ਜੇ ਭਗਵੰਤ ਮਾਨ ਨੂੰ ਬਦਲਣ ਦਾ ਯਤਨ ਵੀ ਕੀਤਾ ਤਾਂ ਕੀ ਇਹ ਕੰਮ ਅਸਾਨੀ ਨਾਲ ਹੋ ਜਾਵੇਗਾ? ਇਹ ਵੀ ਸਵਾਲ ਖੜ੍ਹਾ ਹੁੰਦਾ ਹੈ। ਆਮ ਚਰਚਾ ਇਹ ਵੀ ਚੱਲ ਰਹੀ ਹੈ ਕਿ ਚਾਲੀ ਤੋਂ ਵੱਧ ਵਿਧਾਇਕ ਤਾਂ ਭਗਵੰਤ ਮਾਨ ਨਾਲ ਖੜ੍ਹੇ ਹਨ। ਜੇ ਬਦਲੀ ਕਰਨ ’ਤੇ ਭਗਵੰਤ ਨੇ ਬਹੁਮਤ ਸਪਸ਼ਟ ਕਰਨ ਲਈ ਇਜਾਜ਼ਤ ਮੰਗ ਲਈ ਤਾਂ ਸ਼ਾਇਦ ਦਿੱਲੀ ਵਾਲਿਆਂ ਦੇ ਵਿਰੋਧ ਵਿੱਚ ਹੋਰ ਵੀ ਉਸ ਨਾਲ ਆ ਜਾਣ। ਕੇਂਦਰ ਸਰਕਾਰ ਵੀ ਅਜਿਹੇ ਮੌਕੇ ਆਮ ਆਦਮੀ ਪਾਰਟੀ ਦੀ ਹਾਈਕਮਾਂਡ ਦੇ ਵਿਰੋਧ ਵਿੱਚ ਜ਼ਰੂਰ ਕੁਝ ਨਾ ਕੁਝ ਕਰ ਸਕਦੀ ਹੈ। ਅਜਿਹੇ ਸਮੇਂ ਪੰਜਾਬ ਦੀ ਸਿਆਸਤ ਵਿੱਚ ਹੜਕੰਪ ਮੱਚ ਜਾਵੇਗਾ। ਪਾਰਟੀ ਵਿੱਚ ਟੁੱਟ ਭੱਜ ਹੋਵੇਗੀ ਅਤੇ ਸਰਕਾਰ ਟੁੱਟਣ ਵਾਲੇ ਹਾਲਾਤ ਵੀ ਬਣ ਸਕਦੇ ਹਨ। ਸੂਬੇ ਵਿੱਚ ਰਾਸ਼ਟਰਪਤੀ ਰਾਜ ਲਾਗੂ ਹੋਣ ਦੀ ਸਥਿਤੀ ਵੀ ਪੈਦਾ ਹੋ ਸਕਦੀ ਹੈ।
ਸੋ ਮੁੱਖ ਮੰਤਰੀ ਨੂੰ ਬਦਲਣ ਨਾਲ ਪੰਜਾਬ ਦੇ ਲੋਕਾਂ ਨੂੰ ਕੋਈ ਰਾਹਤ ਨਹੀਂ ਮਿਲਣੀ, ਸਗੋਂ ਹਾਲਾਤ ਖਰਾਬ ਹੋ ਸਕਦੇ ਹਨ। ਪੰਜਾਬ ਦੇ ਲੋਕਾਂ ਨੂੰ ਇਸ ਨਾਲ ਕੋਈ ਸਬੰਧ ਨਹੀਂ ਕਿ ਭਗਵੰਤ ਹੋਵੇ ਜਾਂ ਕੋਈ ਹੋਰ। ਅਸਲ ਰੌਲਾ ਤਾਂ ਭਗਵੰਤ ਮਾਨ ਅਤੇ ਦਿੱਲੀ ਵਾਲਿਆਂ ਦਾ ਹੈ ਜਾਂ ਕਹਿ ਲਈਏ ਪੰਜਾਬ ਦੇ ਖਜ਼ਾਨੇ ਦਾ ਹੈ। ਪਰ ਭਗਵੰਤ ਮਾਨ ਨੂੰ ਲਾਂਭੇ ਕਰਨਾ ਬਹੁਤਾ ਸੌਖਾ ਨਹੀਂ ਹੋਵੇਗਾ। ਪੰਜਾਬੀ ਦੀ ਇੱਕ ਕਹਾਵਤ ਹੈ “ਆਪਣਾ ਮਾਰੂ ਛਾਵੇਂ ਸਿੱਟੂ” ਜੇਕਰ ਭਗਵੰਤ ਮਾਨ ਅਤੇ ਦਿੱਲੀ ਵਾਲੇ ਆਹਮਣੇ ਸਾਹਮਣੇ ਹੋ ਗਏ ਤਾਂ ਪੰਜਾਬ ਦੇ ਲੋਕ ਦਿੱਲੀ ਵਾਲਿਆਂ ਨਾਲ ਖੜ੍ਹਨ ਦੀ ਬਜਾਏ ਭਗਵੰਤ ਮਾਨ ਦੇ ਹੱਕ ਵਿੱਚ ਹਾਅ ਦਾ ਨਾਅਰਾ ਮਾਰਨਗੇ।
* * * * *
ਨੋਟ: ਹਰ ਲੇਖਕ ‘ਸਰੋਕਾਰ’ ਨੂੰ ਭੇਜੀ ਗਈ ਰਚਨਾ ਦੀ ਕਾਪੀ ਆਪਣੇ ਕੋਲ ਸੰਭਾਲਕੇ ਰੱਖੇ।
ਪਾਠਕਾਂ ਨਾਲ ਆਪਣੇ ਵਿਚਾਰ ਸਾਂਝੇ ਕਰਨ ਲਈ ਸਰੋਕਾਰ ਨਾਲ ਸੰਪਰਕ ਕਰੋ: (